Mitthlam Ah Cuan Ter Hmanh
Pathian nih kan semnak Lairam ah harnak kan tuar cuahmah lio ah hi bantuk in vawlei cung ram nuam le dawh bik hmun le ram ah a kan hruai cu khuaruahhar taktak a si ko. A kan hruai duhnak chan a um hrimhrim. Kan miphun hawi hna le kan Lairam sersiam kho ding ah mi ramdang hna rumnak kha hrawm ter a kan duh caah a si. Kan miphun he tahchunh awk a ttha bik mi cu Israel miphun an si. Israel ram ah a um mi Judah mi nak in America ah a um mi Judah mi an tam deuh. Ramdang ah khua a sa mi Judah mi nih an miphun cu an ser. Nihin tiang mi ramdang kut ah tla lo tein an runven khawh.
Kannih Chinmi zong hi lungfim ngaknu ttha le tlangval ttha vialte cu ram dang ah kan chuak dih i nihin Lairam a hngaktu hna cu tar le ngakchia long an si cang. Ngaknu le tlangval an um lo nak ram le khua cu a nuam mi ram a si bal lo. Lairam cu ngaknu le tlangval hna nan zun ngai in lileng in a umnak caan a sau cang. Lairam cu kan zamtaak taktak hnga maw? Kan zam taak kho lai lo. Israel mi bantuk in kan miphun milu zatceu cu Lairam sertu ding ah ram ttha ah Pathian nih a kan len ter. Cu caah Lairam cu Pathian thawngttha in kan ser hrimhrim a hau. Mission rian cu ttuan lo awk kan ttha lo. Miphun tthanchonak rian ah i tel lo awk kan ttha lo. Kan ttuan lo ahcun Pathian nih a kan mawhchiat lai ti hi phan ding a si deuh.
America cu chak le thlang America ram dihlak hi a si. Pathian nih Joshua sinah "Nan keza nih a lamh lai-mi hmun paoh cu nanmah kan pek cang hna" (Joshua 1:3) tiah a chim bantuk in America ram cu Chinmi keza nih a lamh cang. Kan ram le hmun a si ve cang. Nain, Chinmi nih kan ngei kho taktak bal lai lo. Kan ngeih cia mi Lairam long hi kan ram taktak cu a si zungzal ko lai. Europe, Australia le Asia ram cu Chinmi tampi keza nih a lamh cuahmah cang. Mi tampi an ra rih hna lai. Chinmi ram ah an cang lai. Nain, kan ngeih khawh mi ram cu an si lai lo. Lairam long hi kan ram taktak cu a si zungzal lai.
America ram ah Chinmi zumtu hna cu semnak Lairam ah rianttuan ding in 2007 kum in kan dir tti cang. Europe le Australia le Asia ram kip in Chinmi zumtu vialte dir cio in kan Lairam khi hei cuan tti hna usih. Zing zan rawl ei awk ngei lo in vitimen a bau i a ttap lengmang mi ngakchia hna khi cuan hna usih. Dawtmi fa le hna ruah ah chuk le cho a kai lengmang tawn mi kan nu le kan pa le hna khi ruat hna usih. Philh hna hlah usih. Zeidah ka chuan ne lai tiin a tappi kam ah lu i domh in a ttap mi kan Lainu hna mitthli kha ruat tthan hna usih. Zeitindah Lairam caah rianttuan lo cun kan um khawh ual hnga! Um kho hlah! Kan ngeih mi tlawmte cio in kan thawh mi nih Lainu le Laipa nunnak caah a za ko. Kan Lairam hrin ter nak ah a za ko. Pathian thawngttha he Lairam hi thanuam tein hngah khawh ding a si ko rih. Ram ttha leng Chinmi hna nih rianttuan awk tu kan ngei.
America, Europe, Australia le Asia ram kip in Lairam lei ah thinlung in hlei donh hna usih! Pathian thawngttha in Lairam kan ser cang lai. Nang na tel lo a si le ahodah kal in a ttuan kun lai? Kan Bawipa Pathian nih a thawngttha in Lairam sernak caah nangmah theng an herh.
------------------------------------------------||------------------------------------------------
Tinhmi (Goals & Objectives)
To have fellowship to help support each of Chin Baptist churches and Chin Christian churches in America togrow in body and spirit. * America ah a ummi Chin Baptist Khrihfabu hna le Khrihfabu dang hnanih thlarau in kan tthancho khawhnak hnga caah i hawikomhnak ngeih ding. To carry joint mission to spread the Good News of Jesus Christ as its most priority. *Pathian thawngttha karhternak caah joint mission rian ttuan tti ding hi biapi bik in a dirpi lai. To work among the Chins in the America, the abroad, Burma and Chin Hills for developments in education, body and spirit. * America long si lo in, ramdang, Kawlram le Lairam ah a ummi Chinmi hna fimnak, pumsa le thlarau in tthanchonak rian kha ttuan ding. |