Evangelism
Chin Baptist Churches, USA nih kan Lairam ah thawngttha a thei bal lo mi hna sinah thawngttha bia chim ding kha aa tiim. Kawlram ah zalawng tein thawngttha chim khawhnak nawl kan ngeih lo caah thawngttha chim khawh nak caah a phunphun in lam hawl a hau. Paletwa peng ahcun inn pakhat sak i cu hmun ah cawmkengtu ngei reprai lo sifak ngakchia hna kha thawngttha bia in tthan ter ding ah duhnak a ngei. Kanpapet khua zong hi a cunglei bantuk in sifak santlai lo ngakchia hna kha thawngttha bia he an tthan khawh nak ding caah rianttuan aa tiim. A ttha bik mi le kan ram dirhmun he a tlaak bik ning in thawngttha chim ding kha ruah le khuakhan a herh caah ngakchia zohkhenhnak hi tuah ding in timhtuah a si.
Thawngttha bia cu vawlei khua zakip ah a phak hlan tiang chim ding ah zumtu hna cu fial kan si. Kan ngeih mi chaw le va le thiamnak le fimnak le thazang kha hmang in Chinmi zumtu hna nih Lairam ah thawngttha kan chim khawh ahcun kan ram hi vawlei le thlarau in a ceu khawh caan a um te lai.
Zumlo mi hna nih thawngttha an theih i Jesuh Khrih kha Bawi le Khamhtu ah an pom khawh nak ding caah zumtu hna nih thla kan cam piak hna a hau. Thawngttha chimtu hna kan thlah tikah phaisa long kan kuat hna i an caah thla kan cam ttung lo ahcun baunak an ngei kho. Kan thlahmi thawngttha phurtu hna hmur le kaa in a chuak mi Thawngttha cu fiangtein an theih khawh nak hnga caah Thlarau bomhnak an herh. Thlarau rianttuannak kong cu Life of the Church ti mi zawn ah kan ttial cang. Thawngttha kan theih fian khawhnak le kan lung a pem khawh nak cu Thlarau rianttuannak thawng in a si.
Pathian thawngttha hi mi nih an lung a pem tiang in chim a hau. Kawlram ah zumtu hmasabik Maung Naw cu Adoniram Judson nih lam kam deu te chungah a chim mi thawngttha kha a ngai tawn. Jesuh Khrih khamhnak thawngttha kha fiangtein a theih tikah "Gautama biaknak nih cun remnak le khamhnak a kan pe lo. A tu kan sual ahcun a hnu ah harnak kan tuar hrimhrim lai. Dantatnak kha hrial khawh nak lam dang a um lo. Kan sualnak chungin a khamh khawhnak lam a um mi biaknak ka hmuh cang. Pathian Fapa Jesuh Khrih cu ka canai ah harnak a tuar; a thisen in a kan khamh cang" tiah a rak ti. Maung Naw nih cun khrihfa biaknak kha a hngalh in a hngalh long si lo in, Jesuh Khrih dawtnak kha a rak tem. Tu chan ah khrihfami nih kan hman bik mi holh in cun a hrintthan/hrinthar kan ti lai. Zumhnak in a nung. Jesuh Khrih kha zumhnak in a Bawi le Khamtu ah a pom hnu ah Rev. Judson nih June 27, 1819 ni ah tipilnak a pek.
Kawlram Ah Pathian Thawngtha Ratnak