Paam Bawmhnak
Miphun hawi dawt hna:
Lairam ah a tthudir mi kan miphun hawi hna cu rawlttaam tihal le lungrethei ngai in an um hna. A ruang bik cu 2007 kum ah khan mau le rua an par i thei an tlai. Zu tamtuk an chuak i mau le rua thei an ei. A hnu ah lopil ah an tla i facang le cinthlak mi thlaiti vialte an ei dih. 2007 kum kha cafang zun awk ngei lo in an um. 2008 kum thla sarih chung hi purphur le kanghlam chom in khua an sa. Laimi cu tangka hmuhnak (Cash Income) a ngei mi kan si lo caah rawl cawknak zong kan ngei lo. Kum a vui lo tikah vok le ar zong an zua kho lo. Zingzan nunnak kong ah an lungre a thei tuk. Ramdang bawmhnak nih a phan kho hna lo. Cu caah, ramdang ummi an miphun hawi hna nih kan kaa chung rawl chuahpiak kan hau cang hna. Cu lo ahcun rawl lo in an thi taktak lai.
A zualhmabik mi hmun hi facang a cing mi Thantlang peng, Maratlang, le Paletwa peng an si. Paletwa peng ummi hna hi an paam caan ah mautuai an ei i an nung tawn. Tukum cu mau a taam, a thi dih. Hi hnu kum ruk/sarih lo ahcun mautuai ei ding cu a um kho ding a si lo. An paam tikah lo an tuah thiam lo. Kumvui 2009 zong hi an paam tthan lai. Hi bantuk paamnak cu kum ruk/sarih hmanh ah remrel tein khuasak tthan khawh a si lo.
Kan miphun hawi hna hi (1) Thihchanh Bawmhnak (Emergency) le (2) Caansau Bawmhnak tiin bawmhnak phun hnih in tuah kan hau. A tu te ah a herhmi cu Thihchanh Bawmhnak hi a si. Kan tuah lo ahcun kan miphun hawi hna rawlttaam in an thi lai. Hi kong hi Dallas, Tx i CBC, USA BM meeting ah khrihfabu kip sinah chungtel pakhat ah $5.00 khan in bawmhnak i hal ko seh law, rianrang tein bawmhnak hi kuat siseh tiah biachahnak kan tuah. CBC, USA chungtel khrihfabu hna nih chungkhar kip sinah kan miphun hawi hna caah nan kaa chung rawl cu nan chuahpiak ko hna lo ah tiin tlawm kan suk lio a si.
Hi rianttuannak ah lei khuaza leng Laimi hawikom vialte nih nanmah pumpak in maw, khrihfabu in maw, mibu in maw, tlawmsuk hi kan bawm ve ulaw kan miphun Thihchanh Bawmhnak cu ttuan tti ding ah Bawi Khrih min in kan in sawm hna. Nanmah le nan siaremning cio in tangka cu kuat khawh a si ko lai. CBC, USA ngunkeng sinah kuat khawh a si fawn. A ttha bik in CBC, USA upa hna nih tawlrel kan i zuam lai. Harnak a tongmi sinah phak ter kan zuam lai.
Kawlram lei in Zomi Baptist Convention General Secretary Rev. M. Thawng Kam nih cun phaisa na kan kuat zawk lo ahcun, Paletwa peng minung an thih dih ko ttung lai. Ramdang ummi miphun hawi hna nih kan zoh sawh hlah u tiah thawng a kan thanh. An herhnak cu a zualhma taktak.
Phaisa kuatnak cu:
Pu Mang Cung Nung
415 Twinbrook Parkway, Rockville, MD 20851
Phone: 301-838-4549; email: mcnung@yahoo.com
Miphun hawi chanhchuahnak caah thlacamnak he,
Rev. Dr. C. Duh Kam
Executive Minister