Chinmi Chungin Zumtu Hmasabik
Chinmi lakah zumtu hmasabik cu Asho Chin nu a si. Kawlmi sinah rianttuanmi missionary Rev. Francis Mason nih 1834 kum ah Tavoy khua ah tipilnak a pek.(Tobert, Venture of Faith, p. 249).
MARCH 15, 1899
Lothloh in aa cawm mi kan pi le pu, le kan nu le pa hna nih lo ram ttuan ruah ah tthal khuapau chuah lai long an hngak tawn. March thla a chuah in cun khua kip nih lo an duahnak meikhu in cor an chuang i tthal khuapau meithang zaam hna nih Lairam fing le tlang vialte cu a cul dih tawn. Tlang kip ah mei khu hliahmah in an kang. Zan ah fing kip ah meiceu hna cu an lang. Cu ram cu kan Laitlang kan ti tawn mi kha a si. Tlang cung chokhlei le vaurawng hna nih an par tthan. Hngakchia hna nih a runrun in ngate sio ah tiva lei an chuk. Leng le val hna nih ti ngahring dawi le tlang cung kethei le sarzuk hrawn caan a cu hawi cang an ti. An caah duhnak le dawtnak caan sunglawi ah an cang tawn.
Hi tthal mangkha nilinh lingte March 15, 1899 ni ah Rev. Arthur Carson le Mrs. Laura Carson cu Kawlrawn Chinmi sinah an rianttuannak hmun in a rak kai i ngaidi inn 300 hrawng a simi Hakha khua ah an rak phan. Hakha an phak zan cu Siangbawinu nih a pasal Arthur kha a thawh i "Kan umpi kho lai lo, kan umpi kho lai lo, a hmunhma le a minung hna ruangah ka lungrawk cu a si lo. A sining hi ka celh hrimhrim lo caah a si ko" tiah fakpi in a ttap. Voi khat long hmanh si lo in voi tam ngaite aa nolh len. Arthur nih cun "Cu bantuk in chim sawh hlah, thaizing ah cun ni cu a tleu tthan ko lai. Hi kan biakilh 'Tthawnnak a ka petu Khrih thawng in zeithil paoh ka tuah khawh ko hna' hi philh hlah," tiah a ti. Chinmi cu Khrih thawngttha nih a ceuh mi hna miphun kan si lai kha Arthur Carson nih cun a hngalh. Cu ti cun Chinmi kan caah nunnak pek in Pathian thawngttha he rian an ttuan.
Missionaries